អ្នកនាំពាក្យក្រសួងយុត្តិធម៌៖ ករណីសាលាដំបូងខេត្តស្ទឹងត្រែង មិនមែនជារឿងចាប់ច្រឡំមនុស្ស តែក្រុមប្រឹក្សាជំនុំជម្រះពុំមានភស្ដុតាងគ្រប់គ្រាន់ និងរឹងមាំដើម្បីដាក់បន្ទុកផ្ដន្ទាទោសឈ្មោះ ស្លេះ វ៉ើត
By SangKheb Daily
September 4, 2026
លោក ឯម ច័ន្ទមករា អ្នកនាំពាក្យក្រសួងយុត្តិធម៌ នៅថ្ងៃទី៤ ខែកញ្ញា ឆ្នាំ២០២៦ បានចេញមកបញ្ជាក់ជាថ្មីម្ដងទៀតថា ករណីសាលាដំបូងខេត្តស្ទឹងត្រែង មិនមែនជារឿងចាប់ច្រឡំមនុស្សទេ ប៉ុន្តែក្រុមប្រឹក្សាជំនុំជម្រះវាយតម្លៃថា ពុំមានភស្តុតាងគ្រប់គ្រាន់ និងរឹងមាំ ដើម្បីដាក់បន្ទុកផ្តន្ទាទោសលើឈ្មោះ ស្លេះ វ៉ើត។ ក្នុងនាមអ្នកនាំពាក្យក្រសួងយុត្តិធម៌ លោកបានអះអាងថា ករណីបុគ្គលឈ្មោះ ស្លេះ វ៉ើត ដែលសាធារណជនយល់ថាមានការចាប់ច្រឡំឈ្មោះ ត្រូវបានក្រុមប្រឹក្សាជំនុំជម្រះនៃសាលាដំបូងខេត្តស្ទឹងត្រែង សម្រេចសេចក្តីឱ្យរួចផុតពីបទចោទប្រកាន់ និងទទួលបានសេរីភាពឡើងវិញរួចរាល់ហើយ ក្រោយពីបានបញ្ចប់សវនាការផ្លូវច្បាប់។ លោកបានបញ្ជាក់ថា ករណីនេះ មិនមែនជារឿង «ចាប់ច្រឡំមនុស្ស» នោះទេ បើផ្អែកតាមរបាយការណ៍របស់សាលាដំបូងខេត្តស្ទឹងត្រែង ដែលក្រសួងយុត្តិធម៌ទទួលបាននៅថ្ងៃនេះ គឺគ្រប់នីតិវិធីច្បាប់ត្រូវបានអនុវត្តយ៉ាងត្រឹមត្រូវ។ នៅគ្រប់ដំណាក់កាល ទាំងចៅក្រមស៊ើបសួរ និងក្រុមប្រឹក្សាជំនុំជម្រះ សាមីខ្លួនមិនដែលបានបដិសេធអំពីអត្តសញ្ញាណរបស់ខ្លួនម្តងណាឡើយ គឺបានធ្វើការផ្ទៀងផ្ទាត់អត្តសញ្ញាណជនត្រូវចោទយ៉ាងច្បាស់លាស់មុនពេលសាកសួរ។ នៅក្នុងដំណើរការនីតិវិធីទាំងនោះ ជនជាប់ចោទមិនដែលបានបដិសេធអំពីអត្តសញ្ញាណរបស់ខ្លួន (ថាខ្លួនមិនមែនឈ្មោះ ស្លេះ វ៉ើត នោះទេ) នៅចំពោះមុខស្ថាប័នតុលាការឡើយ ដូច្នេះតុលាការមានកាតព្វកិច្ចបន្តនីតិវិធីសវនាការស្របតាមច្បាប់។លោកបានបន្ថែមទៀតថា ផ្អែកតាមរបាយការណ៍របស់សាលាដំបូងខេត្តស្ទឹងត្រែង ការដែលតុលាការសម្រេចឱ្យបុគ្គលរូបនេះរួចផុតពីការចោទប្រកាន់ គឺមិនមែនដោយសារតែតុលាការរកឃើញថាមានការចាប់ច្រឡំមនុស្សនោះទេ ប៉ុន្តែដោយសារតែនៅក្នុងសវនាការ ក្រោយពីបានស្តាប់ចម្លើយតទល់ជាមួយសាក្សី ភាគីពាក់ព័ន្ធ និងមេធាវីការពារក្ដី ក្រុមប្រឹក្សាជំនុំជម្រះវាយតម្លៃថា ពុំមានភស្តុតាងគ្រប់គ្រាន់ និងរឹងមាំ ដើម្បីដាក់បន្ទុកផ្តន្ទាទោសលើឈ្មោះ ស្លេះ វ៉ើតឡើយ។ ដូច្នេះផ្អែកលើអង្គហេតុ និងអង្គច្បាប់ ទើបក្រុមប្រឹក្សាជំនុំជម្រះបានសម្រេចសេចក្តីឱ្យរួចផុតពីបទកាប់គាស់ រុករានដីព្រៃ ឆ្ការ ដុត និងឈូសឆាយដីព្រឺដើម្បីយកធ្វើជាកម្មសិទ្ធិ។ទោះបីជាយ៉ាងណាក៏ដោយ ក្រសួងយុត្តិធម៌នឹងបន្តតាមដានដោយយកចិត្តទុកដាក់ចំពោះករណីនេះ ហើយយន្តការនៃក្រុមអធិការកិច្ចរបស់ក្រសួងនៅតែដំណើរការជាធម្មតា ដើម្បីពិនិត្យមើលភាពត្រឹមត្រូវនៃការអនុវត្តិនីតិវិធីចំពោះករណីខាងលើ៕