សម្តេចបវរធិបតី ហ៊ុន ម៉ាណែត ជួបពិភាក្សាការងារទ្វេភាគីជាមួយប្រធានាធិបតីរុស្ស៊ី លោក ពូទីន មុនធ្វើមាតុភូមិនិវត្តន៍ត្រឡប់មកកម្ពុជា
By Sam Sitha
June 19, 2026
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូរាជរដ្ឋាភិបាលកម្ពុជា ចាកចេញពីអាកាសយានដ្ឋានអន្តរជាតិនៃសហព័ន្ធរុស្ស៊ី នាយប់ថ្ងៃទី១៨ ខែមិថុនា ឆ្នាំ២០២៦ បន្ទាប់ពីបានចូលរួមកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-រុស្ស៊ី ក្នុងឱកាសខួបអនុស្សាវរីយ៍លើកទី៣៥ នៃទំនាក់ទំនងអាស៊ាន-រុស្ស៊ី។កិច្ចប្រជុំកំពូលនេះបានរៀបចំឡើងនៅទីក្រុងកាហ្សាន សហព័ន្ធរុស្ស៊ី តបតាមការអញ្ជើញរបស់ឯកឧត្តម វ៉្លាឌីមៀ ពូទីន (Vladimir Putin) ប្រធានាធិបតីនៃសហព័ន្ធរុស្ស៊ី។ ការចូលរួមរបស់សម្តេចនាយករដ្ឋមន្ត្រី ឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការពង្រឹងនិងពង្រីកទំនាក់ទំនងមិត្តភាព និងកិច្ចសហប្រតិបត្តិការរវាងអាស៊ាន និងរុស្ស៊ី លើគ្រប់វិស័យទាំងនយោបាយ សេដ្ឋកិច្ច វប្បធម៌ និងមនុស្សធម៌។ក្នុងអំឡុងពេលនៃកិច្ចប្រជុំកំពូលនេះ សម្តេចមហាបវរធិបតី ហ៊ុន ម៉ាណែត បានមានឱកាសជួបពិភាក្សាទ្វេភាគីជាមួយឯកឧត្តម វ៉្លាឌីមៀ ពូទីន ព្រមទាំងថ្នាក់ដឹកនាំប្រទេសអាស៊ានផ្សេងទៀត ដើម្បីពិភាក្សាលើបញ្ហាតំបន់ និងអន្តរជាតិដែលជាផលប្រយោជន៍រួម។ ការទស្សនកិច្ចនេះក៏បានរួមចំណែកយ៉ាងសំខាន់ក្នុងការលើកកម្ពស់ទំនាក់ទំនងរវាងកម្ពុជា និងរុស្ស៊ី ឱ្យកាន់តែរឹងមាំឡើងបន្ថែមទៀត។
