អ៊ីរ៉ង់ប្រកាស “តាមសម្លាប់” នេតាន់យ៉ាហ៊ូ អោយខានតែបាន
By admin
March 16, 2026
តេអេរ៉ង់៖ កងទ័ពបដិវត្តន៍អ៊ីរ៉ង់ (IRGC) បានប្រកាសជាផ្លូវការនៅថ្ងៃនេះថា ខ្លួននឹងបន្ត “តាមប្រមាញ់ និងសម្លាប់” លោក បេនចាមីន នេតាយ៉ាហ៊ូ នាយករដ្ឋមន្ត្រីអ៊ីស្រាអែល បន្ទាប់ពីមានពាក្យចចាមអារ៉ាមយ៉ាងខ្លាំងក្លានៅលើបណ្តាញសង្គមថា លោក នេតាយ៉ាហ៊ូ ត្រូវបានទទួលមរណភាពក្នុងការវាយប្រហារពីសំណាក់ក្រុមហេហ្ស៊បូឡា ។
កាសែត Sepah News របស់កងទ័ពបដិវត្តន៍អ៊ីរ៉ង់បានដកស្រង់សម្តីមេដឹកនាំ IRGC ថា៖ «ប្រសិនបើឧក្រិដ្ឋជនសម្លាប់កុមាររូបនេះនៅមានជីវិត យើងនឹងបន្តតាមប្រមាញ់ និងសម្លាប់គាត់ដោយកម្លាំងពេញទំហឹង» ។ ការគំរាមកំហែងនេះត្រូវបានធ្វើឡើងក្នុងពេលដែល IRGC អះអាងថាបានបើកការវាយប្រហារជាបន្តបន្ទាប់ដោយមីស៊ីល និងយន្តហោះគ្មានមនុស្សបើកជាង ៥០ លើក រួមទាំងការវាយប្រហារគោលដៅនៅអ៊ីស្រាអែល និងមូលដ្ឋានទ័ពអាមេរិកចំនួនបីនៅក្នុងតំបន់ ក្រោមប្រតិបត្តិការឈ្មោះថា “True Promise 4” ។
ការប្រកាសរបស់ IRGC ធ្វើឡើងបន្ទាប់ពីមានព័ត៌មានផ្សព្វផ្សាយយ៉ាងខ្លាំងនៅលើបណ្តាញសង្គមថា លោក នេតាយ៉ាហ៊ូ អាចនឹងត្រូវបានសម្លាប់ ឬរងរបួសធ្ងន់ធ្ងរ។ ការស្មាននេះកើតឡើងបន្ទាប់ពីការចុះផ្សាយវីដេអូមួយនៅលើគណនី X (Twitter) ផ្លូវការរបស់លោក នេតាយ៉ាហ៊ូ ដែលអ្នកប្រើប្រាស់បណ្តាញសង្គមមួយចំនួនបានអះអាងថា បានឃើញភាពមិនប្រក្រតីដូចជាម្រាមដៃប្រាំមួយ ដែលនាំឱ្យគេសន្និដ្ឋានថាវីដេអូនោះអាចត្រូវបានកែសម្រួល ឬបង្កើតឡើងដោយប្រើបញ្ញាសិប្បនិម្មិត (AI) ។
ទោះបីជាយ៉ាងណាក៏ដោយ ការិយាល័យនាយករដ្ឋមន្ត្រីអ៊ីស្រាអែលបានចេញសេចក្តីថ្លែងការណ៍មួយភ្លាមៗ ដោយបដិសេធទាំងស្រុងនូវពាក្យចចាមអារ៉ាមទាំងនេះ ដោយហៅវាថាជា “ព័ត៌មានក្លែងក្លាយ” (fake news) និងបញ្ជាក់ថា លោក នេតាយ៉ាហ៊ូ “មានសុខភាពល្អ និងកំពុងបំពេញភារកិច្ចរបស់ខ្លួនជាធម្មតា” ។ ការបដិសេធនេះគឺដើម្បីឆ្លើយតបទៅនឹងការផ្សព្វផ្សាយព័ត៌មានមិនពិតដែលថា លោក នេតាយ៉ាហ៊ូ ត្រូវបានទទួលមរណភាព ។
ភាពតានតឹងក្នុងតំបន់មជ្ឈិមបូព៌ាបានកើនឡើងយ៉ាងខ្លាំង ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហាររួមគ្នាមួយទៅលើប្រទេសអ៊ីរ៉ង់កាលពីថ្ងៃទី ២៨ ខែកុម្ភៈ ឆ្នាំ២០២៦។ ប្រភពព័ត៌មានអ៊ីរ៉ង់បានឱ្យដឹងថា ការវាយប្រហារនោះបានសម្លាប់មនុស្សយ៉ាងតិច ១,៣០០ នាក់ ក្នុងនោះរួមទាំងមេដឹកនាំកំពូលរបស់អ៊ីរ៉ង់ លោក អាយ៉ាតុឡោះ អាលី ខេមនី ផងដែរ ។ IRGC បានចាត់ទុកការវាយប្រហារនេះជាមូលហេតុចម្បងនៃប្រតិបត្តិការសងសឹករបស់ខ្លួន ៕