ស្នងការដ្ឋាននគរបាលខេត្តព្រះសីហនុ ឃាត់ខ្លួនជនដៃដល់ក្នុងករណីឃាតកម្មគិតទុកជាមុននៅឆ្នេរអូត្រេះ២
By SangKheb Daily
May 15, 2026
ព្រះសីហនុ៖ កម្លាំងសមត្ថកិច្ចនៃស្នងការដ្ឋាននគរបាលខេត្តព្រះសីហនុ បានចាប់ឃាត់ខ្លួនជនដៃដល់បានភ្លាមៗ ក្នុងករណីឃាតកម្មគិតទុកជាមុន ដោយសម្លាប់ស្ត្រីរងគ្រោះ ដោយសារជម្លោះស្នេហា (ស្រីស្រឡាញ់ស្រី)។ករណីនេះបានកើតឡើងកាលពីវេលាម៉ោងជិត១០យប់ ថ្ងៃទី១៤ ខែឧសភា ឆ្នាំ២០២៦ នៅចំណុចចុងឆ្នេរអូត្រេះ២ ស្ថិតក្នុងសង្កាត់លេខ៤ ក្រុងព្រះសីហនុ។ ជនរងគ្រោះត្រូវបានជនល្មើសប្រើកាំបិតអារក សម្លាប់បណ្តាលឲ្យស្លាប់ភ្លាមៗនៅកន្លែងកើតហេតុ។ សមត្ថកិច្ចបានឲ្យដឹងថា ជនរងគ្រោះឈ្មោះ តាំង ស្រីនិច្ច អាយុ២២ឆ្នាំ ជាគ្រូបង្រៀននៅសាលាសុវណ្ណភូមិ ខេត្តព្រះសីហនុ។ រីឯជនសង្ស័យជាស្ត្រីផងដែរ ដែលមានជម្លោះស្នេហាជាមួយជនរងគ្រោះ។ បើតាមប្រភពពីសមត្ថកិច្ចខេត្តព្រះសីហនុ បានឲ្យដឹងថា ករណីនេះផ្ដើមចេញពីជម្លោះស្នេហារវាងស្ត្រីស្រឡាញ់ស្ត្រី ហើយជនសង្ស័យបានគិតទុកជាមុន រួចធ្វើសកម្មភាពសម្លាប់ជនរងគ្រោះ។ បច្ចុប្បន្ន សមត្ថកិច្ចបានឃាត់ខ្លួនជនដៃដល់បានហើយ និងកំពុងបន្តនីតិវិធីស៊ើបអង្កេត ដើម្បីកសាងសំណុំរឿងបញ្ជូនទៅតុលាការ។